1
    HEBREZEMA.INFO
    INDEPENDENT NEWS & MEDIA
    DESIGNED BY ZEWDU TEKLU
    © COPYRIGHT. ALL RIGHTS RESERVED 2007.
አዲሰ አበባ ሃምሌ 13/2009 በአዲስ አበባ በኦሮምኛ ቋንቋ (አፋን ኦሮሞ) የሚያስተምሩ አራት የመጀመሪያ
ደረጃ ትምህርት ቤቶች ተመረቁ።

በጉለሌና በኮልፌ ቀራኒዮ ክፍለ ከተሞች የተገነቡት ሁለት ትምህርት ቤቶች በአገሪቷ ህዝብ ዘንድ ትልቅ ክብር ባተረፉት
ጄኔራል ዋቆ ጉቱና በጄኔራል ታደሰ ብሩ ስም ተሰይመዋል።

በየካና በነፋስ ስልክ ላፍቶ ክፍለ ከተሞች የተገነቡት ደግሞ" 'ጋራ ጉሪ' የመጀመሪያ ትምህርት ቤት እና 'ቡርቃ
ዋዮ' የመጀመሪያ ትምህርት ቤት" ተብለው ይጠራሉ።

የኦሮሚያ ብሄራዊ ክልላዊ መንግስት ፕሬዚዳንት ለማ መገርሳ በምረቃ ሥነ-ስርዓቱ ላይ እንደተናገሩት፤ የትምህርት
ቤቶቹ ግንባታ ከፊደል መቁጠሪያነት ባለፈ ለዘመናት የቆየውን ታሪካዊና ፖሊቲካዊ ጥያቄ የመለሰ ነው።

የብሄሩ ተወላጅ በከተማዋ ላይ በማንነቱ አፍሮና በቋንቋው የመማር እድል አጥቶ የቤተሰቡን ቋንቋ፣ ባህልና ታሪክ
ካለማወቁ ባለፈ ማንነቱን እስከ መደበቅ ደርሶ እንደነበር አስታውሰዋል።

ትምህርት ቤቶቹ የኦሮሞን ህዝብ ቋንቋ፣ ባህል፣ ታሪክና ማንነትን በከተማዋ ለሚኖሩ የብሄሩ ተወላጆችና ፍላጎቱ ላላቸው
ሁሉ ማስተማሪያ ማዕከል እንደሚሆኑም ነው የገለጹት።

የአዲስ አበባ ከተማ አስተዳደር ከንቲባ ድሪባ ኩማ በበኩላቸው ትምህርት ቤቶቹ  ባለፉት ሁለት አስርት ዓመታት
በአገሪቷ እየተገነባ የመጣው የዴሞክራሲ ሥርዓትና የብሄሮች መብት አጠባበቅ የደረሰበት ከፍታ ማሳያ እንደሆነም
ተናግረዋል።

በከተማዋ የኦሮሞ ህዝብ ባህልና ታሪክ ተመልሶ እንዲያንሰራራና ጥቅሙ እንዲጠበቅለት የከተማ አስተዳደር ከክልሉ
መንግሥት ጋር እንደሚሰራም አረጋግጠዋል።

"የትምህርት ቤቶቹ ግንባታ የትምህርት ተደራሽነትን ለማስፋትና በአፍ መፍቻ ቋንቋ የመማር መብት ለማስጠበቅ
የሚደረገው ጥረት አካል ነው" ያሉት ደግሞ የክልሉ ትምህርት ቢሮ ኃላፊ ዶክተር ቶላ በሪሶ ናቸው።

ትምህርት ቤቶቹን ለመገንባት ከክልሉ መንግሥትና የውጭ እርዳታ ድርጅቶች የተገኘ ከ64 ሚሊዮን ብር በላይ ወጪ
መደረጉን ጠቁመው፤ ትምህርት ቤቶቹ ከአንደኛ እሰከ ስምንተኛ ክፍል ተማሪዎችን ተቀብለው ለማስተማር ዝግጁ
መሆናቸውንም ገልጸዋል።

ትምህርት ቤቶቹ ከነሐሴ 20 ቀን 2009 ዓ.ም ጀምሮ ምዝገባ የሚጀምሩ ሲሆን፤ ከርቀት ለሚመጡ ተማሪዎች
ማመላለሻ ተሽከርካሪ መዘጋጀቱን አመልክተዋል።

ለኦሮሚያ ትምህርት ቢሮ በ430 ሚሊዮን ብር ባለ ዘጠኝ ፎቅ ህንጻ ለማስገንባትም በንፋስ ስልክ ላፍቶ ክፍለ ከተማ
የመሰረት ድንጋይ ተቀምጧል።

በምረቃ ሥነ ስርዓቱ ወቅት የኦሮሚያ ክልልና የፌዴራል ከፍተኛ የሥራ ኃላፊዎች ተገኝተዋል።
admin@hebrezema.info
1