1
    HEBREZEMA.INFO
    INDEPENDENT NEWS & MEDIA
    DESIGNED BY ZEWDU TEKLU
    © COPYRIGHT. ALL RIGHTS RESERVED 2007.
ኢቢሲ በምክር ቤቱ የተካሄዱ መድረኮችን በአግባቡ ያላስተላለፈበትን ምክንያት በ15 ቀናት ውስጥ
እንዲያቀርብ ተጠየቀ
May 11, 2017
(ኢዜአ)- የኢትዮጵያ ብሮድካስቲንግ ኮርፖሬሽን (ኢቢሲ) በሕዝብ ተወካዮች ምክር ቤት የተካሄዱ የተለያዩ
መድረኮችን በአግባቡ ያላስተላለፈበትን ምክንያትና ተጠያቂ የሚሆነውን አካል በተመለከተ በ15 ቀናት ውስጥ ሪፖርት
እንዲያቀርብ ተጠየቀ።

የሕዝብ ተወካዮች ምክር ቤት 2ኛ ዓመት የስራ ዘመን 31ኛ መደበኛ ስብሰባውን ባካሄደበት ወቅት የኢትዮጵያ
ብሮድካስቲንግ ኮርፖሬሽንን የተመለከተ የውሳኔ ኃሳብ አጽድቋል።

የባህል፣ ቱሪዝምና መገናኛ  ብዙኃን ጉዳዮች ቋሚ ኮሚቴ ኮርፖሬሽኑ በአሰራር፣ በክህሎትና በአመራር ረገድ ሰፋ ያሉ
ችግሮች የሚታዩበት ተቋም ነው ብሏል።

በመሆኑም ምክር ቤቱ በ29ኛ መደበኛ ስብሰባው በኮርፖሬሽኑ ላይ ከአባላቱ የተሰጡ አስተያየቶችን መሠረት በማድረግ
የውሳኔ ሃሳብ ቁጥር 13/2009 ለምክር ቤት አቅርቧል።

የውሳኔ ሃሳቡን ያቀረቡት የቋሚ ኮሚቴው ሰብሳቢ ወይዘሮ ፈቲያ የሱፍ በኮርፖሬሽኑ የውስጥና የውጭ ጣልቃ ገብነት
መኖሩ በኮርፖሬሽኑ ነጻነት ላይ ተፅዕኖ መኖሩ አንዱ ማሳያ መሆኑን ገልጸዋል።

የሰብዓዊ መብት ኮሚሽንና ምክር ቤቱ ከህዝብ ክንፍ ጋር ያዘጋጀው የተለያዩ መድረኮችን ያላስተላለፈ መሆኑ እንደ
ጭብጥ ተወስዷል ነው ያሉት።

በተጨማሪም በምክር ቤቱም ሆነ በቋሚ ኮሚቴዎች የሚተላለፉ ውሳኔዎች ተገቢውን ትኩረት አግኝተው ይዘታቸው
ሳይዛነፍ አለመተላለፍም ታይቷል ብለዋል።

በተሃድሶ ወቅት በተደረገ የሰራተኞች የውይይት መድረክ የትምክህት፣ የጠባብነትና የቡድንተኝነት፣ የኪራይ ሰብሳቢነትና
በቤተሰብ መሳሳብ በተግባርና በአመለካከት መታየቱም በጭብጥነት መወሰዱን ገልጸዋል።

ከዚህ ባለፈ ተልዕኮን መሠረት ያደረገ የጋዜጠኛ ስምሪት ያለማድረግ፣ የጋዜጠኛው ብቃትና ክህሎት ማነስና ሌሎች የሥነ
ምግባር ችግሮችም መኖራቸውን ገልጸዋል።

በማስታወቂያ ህግ መሠረት ይዘታቸው ያልተፈቀደ ማስታወቂያ ማስተላለፍና የማስታወቂያ የጊዜ ምጣኔ አጠቃቀም በአንድ
ሰዓት 12 ደቂቃ ቢሆንም ኮርፖሬሽኑ ይህን ህግ መጣሱን ብሮድካስት ባለሥልጣን አረጋግጧል ተብሏል።

ምክር ቤቱ እነዚህን ጭብጦች መነሻ በማድረግ የሰብዓዊ መብትና ምክር ቤቱን የተመለከቱ ዘገባዎች ለምን እንዳልተላለፉ
በዝርዝር በመገምገም በ15 ቀናት ውስጥ ሪፖርት እንዲያቀርብ አሳስቧል።

የምክር ቤቱ ውሳኔዎች ቢያንስ የአንድ ሰዓት ቋሚ የአየር ሰዓት መድቦ የማያስተላልፍበትን ምክንያት በዝርዝር ገምግሞ
ተጠያቂ የሚሆኑትን አካላት በመለየት እርምጃ መውሰዱንም ያከተተ ሪፖርት እንዲያቀርብ ጠይቋል።

ምክር ቤቱ ለኮርፖሬሽኑ አስፈላጊውን እገዛ እንደሚያደርግ የገለጹት ወይዘሮ ፈቲያ፣ ኮርፖሬሽኑ በጥናት ላይ የተመሰረተ
ለውጥ የሚያመጣ  እርምጃ ሊወስድ ይገባል ነው ያሉት።

የምክር ቤቱ አባላት በበኩላቸው በኮርፖሬሽኑ ጣልቃ የሚገቡት ‘እነማን’ እንደሆኑ በዝርዝር ቢቀመጥ፣ በኮርፖሬሽኑ ቀርቦ
የነበረው የበጀት ጉዳይ በዝርዝር ቢቀመጥ የሚሉ ሃሳቦችን ሰንዝረዋል።

የተሰጠው የ15 ቀን ገደብ የሚያንስ መሆኑን የጠቀሱት አባላቱ በጥቅሉ የውሳኔ ሃሳቡ መሠረታዊ ነጥቦችን የያዘና
ኮርፖሬሽኑን ከችግር ለማውጣት የሚረዳ መሆኑን አንስተዋል።

የተጠየቁት ጉዳዮች ዝርዝር በመሆናቸው ኮርፖሬሽኑ በ15 ቀናት ውስጥ ሪፖርት ማድረግ ‘አያቅተውም፤ በቂ ነው’
በማለት ወይዘሮ ፈቲያና አፈ ጉባኤ አባዱላ ገመዳ ሃሳባቸውን ሰንዝረዋል።

በተያያዘም ምክር ቤቱ የኢትዮጵያ ምርት ገበያ ማቋቋሚያ አዋጅን ለማሻሻል የቀረበ ረቂቅ አዋጅን መርምሮ ለሕግ
ጉዳዮች ቋሚ ኮሚቴ መርቷል።

የጨረራና የኒውክለር መከላከያ ረቂቅ አዋጅን ለማሻሻልና የመንግሥት ቤቶች ኤጀንሲን አፍርሶ የመንግሥት የልማት
ድርጅት ሆኖ እንዲቋቋም የተዘጋጀውን ረቂቅ አዋጅም መርምሮ ለሚመለከተው ቋሚ ኮሚቴ መርቷል።
admin@hebrezema.info
1