1
    HEBREZEMA.INFO
    INDEPENDENT NEWS & MEDIA
    DESIGNED BY ZEWDU TEKLU
    © COPYRIGHT. ALL RIGHTS RESERVED 2007.
የኦሮሚያ ክልል ለስራ እድል ምቹ የሆኑ እድሎችን በመለየት ላይ እንደሚገኝ አስታወቀ
May 11, 2018
በኦሮሚያ ክልል በስፋት የሚታየውን ስራ አጥነት ለመቀነስ ለስራ ፈጠራ ምቹ የሆኑ አቅሞችን የመለየት ስራ እየተሰራ
መሆኑን የክልሉ የስራ እድል ፈጠራ እና የከተሞች ምግብ ዋስትና ኤጀንሲ አስታወቀ፡፡

በክልሉ ከ6 ሚሊየን ብር በላይ ስራ አጥ ወጣቶች እንደሚገኙ የተገለፀ ሲሆን፥ ይህን የስራ አጥ ቁጥር ለመቀነስ ከቅርብ
አመታት ወዲህ በትኩረት እየተሰራ እንደሆነም ተገልጿል፡፡

የኤጀንሲው ዋና ዳይሬክተር አቶ አወሉ አብዲ ለፋና ብሮድካስቲንግ ኮርፖሬት እንደገለፁት ከቀበሌ ጀምሮ እስከ ፌዴራል
እንዲሁም በውጭ ሀገር ያለውን የስራ እድል ለመጠቀም ትኩረት በማድረግ እየተሰራ ነው።

ወጣቶቹን ከማደራጀት ባለፈም ወደ ስራ እንዲገቡ የገበያ ትስስር እየተፈጠረ መሆኑን ተናግረዋል።

ከእነዚህ እርምጃዎች መካከል የግንባታው ዘርፍ አንዱ ሲሆን፥ የተደራጁ ወጣቶች ስራ እንዲያገኙ 10 ሚሊየን ብር
የሚያወጣ ፕሮጀክት ላይ ተሳታፊ አንዲሆኑ ተደርጓል ብለዋል።

በተጨማሪም በንግዱ ዘርፍ በማህበራት የተደራጁ ወጣቶች እስከ 5 ሚሊየን ብር በሚደርስ ግዥ ተወዳዳሪው በመሆን
ተጠቃሚ ለማድረግ መሰራቱንም ገልፀዋል፡፡

በክልሉ የስራ እድል ለመፍጠር ከተለዩት የተፈጥሮ ሀብት አንዱ ሲሆን፥ በዚህም ከ700 ሺህ ሄክታር በላይ መሬት
እንደተለየ ነው ዳይሬክተሩ ያስታወቁት።

ሆኖም የመሰረተ ልማት ችግር በክልሉ ያሉ የስራ እድሎችን ለመጠቀም በተወሰነ ደረጃ እንቅፋት መሆኑ ተጠቁሟል።

በማሳያነትም በምዕራብ ሸዋ ዞን ባለው የአሸዋ ሀብት ከ100 ሺህ በላይ ለሚሆኑ ወጣቶች የስራ እድል መፍጠር እየተቻለ
በመንገድ ችግር ምክንያት ያለውን አቅም መጠቀም እንዳልተቻለ ተናግረዋል።

በፊዴራል ደረጃ ያሉ የስራ እድሎች ለመጠቀምም ከትራንስፖርት እና መንገዶች ባለስልጣን ጋር ውይይት እየተደረገ
ሲሆን፥ በቅርቡ ውሳኔ ላይ እንደሚደረስ ገልፀዋል።

በዘርፉ ትክክለኛውን ስራ አጥ ተጠቃሚ ለማድረግ እና ወደ ስራ ለማስገባት በሚደረገው ሂደት በከተሞች የተደራጀ ሼድ
ያለአግባብ መውሰድ፣ ለዘመድ ማስተላለፍ እና ገንዘብ ተበድሮ መጥፋት የሚታዩ ችግሮ ናቸው ተብሏል።

ይህንን ችግር ለመቅረፍም የመረጃ አያያዝ ስርአቱን ለማዘመን የሚያስችል አሰራር ለመዘርጋት ተግባራዊ አንቅስቃሴ
እንደተጀመረም አስታውቀዋል።

በሚፈለገው ደረጃ ብዙ ያልተሰራባቸው እና በአጭር ጊዜ የወጣቱ ህይወት ሊቀይሩ በሚችሉ የጨርቃጨርቅ ስራዎች ላይ
በቀጣይ ትኩረት ይደረጋል ተብሏል።
admin@hebrezema.info
1