ሕወሓት አጎራባች ክልሎች ላይ ተከታታይነት ያለው ትንኮሳ እየፈጸመ ነው - ቢለኔ ስዩም





July 28,2021





ሕወሓት አጎራባች ክልሎች ላይ ተከታታይነት ያለው ትንኮሳ እየፈጸመ ነው - ቢለኔ ስዩም አዲስ አበባ ፣


አሸባሪው ሕወሓት አጎራባች ክልሎች ላይ ተከታታይነት ያለው ትንኮሳ እየፈጸመ መሆኑን የጠቅላይ ሚኒስትር ፅህፈት ቤት ፕሬስ ሴክሬታሪ ቢለኔ ስዩም ገለጹ፡፡


ቢለኔ ስዩም በዛሬው እለት ለሃገር ውስጥ እና የውጭ ሚዲያዎች መግለጫ ሰጥተዋል፡፡ በመግለጫቸውም አሸባሪው ቡድን በአማራ እና አፋር ክልሎች በተከታታይነት ትንኮሳ እየፈጸመ መሆኑን ተናግረዋል፡፡

ከዚህ ባለፈም ቡድኑ የግለሰቦችን ንብረት ማውደሙን እና መዝረፉንም ገልጸዋል፡፡


መንግስት በትግራይ ክልል የተናጥል የተኩስ አቁም መድረሱን በመጥቀስም፥ ህወሓት ይህን የተኩስ አቁም በይፋ መጣሱንም አውስተዋል፡፡ ይህም በተለይም ለችግር የተጋለጡ እና እርዳታ የሚፈልጉ ዜጎችን ተደራሽ ለማድረግና በአካባቢው ለጥቃት የተጋለጡ የኤርትራ ስደተኞችን ወደ ሰላማዊ አካባቢዎች ለማዛወር በመንግስት በኩል የተደረገውን ጥረት አስተጓጉሏል ነው ያሉት፡፡ በተያያዘም ስድስት ኤርትራውያን ስደተኞች በአሸባሪው ሕወሓት መገደላቸውንም ነው የገለጹት፡፡


ከዚህ ባለፈም ቡድኑ ህጻናትን ለውትድርና በመመልመል ንጹሃንን እንደ መሸሸጊያ እየተጠቀመባቸው መሆኑን በተጨባጭ ማስረጃ ማረጋገጥ መቻሉን አስረድተዋል፡፡ መላው ህዝብም ይህን የአሸባሪውን ድርጊት በይፋ መቃወሙንም በመግለጫቸው አንስተዋል፡፡ ፕሬስ ሴክሬታሪዋ መንግስት የደረሰውን የተኩስ አቁም አክብሮ እየተንቀሳቀሰ ይገኛልም ብለዋል፡፡